အပစ်အခတ် ရပ်စဲရေး သဘောတူညီချက်မှာ လက်ဘနွန်ရှိ ဟက်ဇ်ဘိုလာအဖွဲ့အပေါ် အစ္စရေးက လွတ်လပ်စွာ တိုက်ခိုက်ခွင့်ပါရမယ်လို့ အစ္စရေးက တောင်းဆိုလိုက်ပါတယ်။ ဒါပေမဲ့ လက်ဘနွန်ရဲ့ အချုပ်အခြာအာဏာကို ထိပါးတဲ့ ဘယ်အပစ်ရပ် သဘောတူညီချက်ကိုမဆို လက်မခံနိုင်ဘူး လို့ ဟက်ဇ်ဘိုလာ အကြီးအကဲ က ဗုဒ္ဓဟူးနေ့မှာပဲ ပြောလိုက်ပါတယ်။
ဟက်ဇ်ဘိုလာ ရဲ့ အန္တရာယ်ကနေ အစ္စရေး နိုင်ငံသားတွေကို ကာကွယ်ပိုင်ခွင့်၊ အရေးယူ ဆောင်ရွက်ပိုင်ခွင့် အစ္စရေး စစ်တပ်မှာ ရှိတယ်လို့ အစ္စရေး ကာကွယ်ရေးဝန်ကြီး Israel Katz က ဆိုပါတယ်။ တကယ်လို့ သဘောတူတာကို ချိုးဖောက်လာခဲ့ရင်၊ လွတ်လပ်စွာ အရေးယူ ဆောင်ရွက်ပိုင်ခွင့် သဘောတူညီချက်ထဲမှာ ပါရှိရပါမယ်လို့ အစ္စရေး နိုင်ငံခြားရေး ဝန်ကြီး Gideon Saar က ဂျေရူဆလမ်မှာ သံတမန်တွေကို ပြောပါတယ်။
လက်ဘနွန် အချုပ်အခြာ အာဏာကို ထိန်းသိမ်းပြီး၊ အစ္စရေး က ဝင်ချင်သလို ဝင်လာတာ အဆုံးသတ်ရမယ်လို့ ကြိုတင်အသံသွင်းထားတဲ့ မိန့်ခွန်းမှာ Kassem က ဗုဒ္ဓဟူးနေ့က ပြောပါတယ်။ အစ္စရေး နဲ့ လက်ဘနွန်ကြား သဘောတူညီချက် ရအောင်ကြိုးစားနေတဲ့ အမေရိကန် သံတမန် Amos Hochstein ဟာ ၂ ရက်ကြာ သူ့ခရီးစဥ်ကို ဗုဒ္ဓဟူးနေ့က အဆုံးသတ်လိုက်ပါတယ်။ တကယ့်အခွင့်အလမ်း ရှိနေပါတယ် လို့ အင်္ဂါနေ့တုန်းကတော့ သူက ဆိုပါတယ်။
Forum